Wees lief vir jouself

''Jy kannie 'n ander liefhê totdat jy jouself waarlik liefhet nie.''

 

Tot in my dertigs het ek nooit veel aandag gegee aan wat hierdie gesegde eintlik bedoel nie. Ek het van een aktiwiteit na 'n ander beweeg, probeer om 'n leemte wat daar was te vul maar ek het nie geweet hoekom nie. Ek het altyd probeer om in te pas, probeer dat almal van my hou, probeer om almal se goedkeuring weg te dra. 

Derhalwe het ek nooit die tyd geneem om agter te kom wat spesiaal en uniek omtrent myself was nie.

Self-liefde is 'n vibrasie.
As ek myself lief het en ek dink ek is cool, dan wys dit. As ek skaam voel oor wie ek is, of as ek fokus op wat ek 'moet doen' of wat ek 'moet wees', dan wys dit ook.

As jy al ooit in die teenwoordigheid van iemand was wat baie self-bewus is, sal jy weet wat ek bedoel.

Ek was eers daardie persoon.

Ek was so behep met hoe ek lyk aan die buitekant, wat eintlik net 'n weerspieëling was van hoe ek binne gevoel het, dat ek seker baie self-betrokke voorgekom het.

Ek kon nêrens behoorlik teenwoordig wees nie, en ek is seker almal om my het gedink ek is nie in hulle geïnteresseerd nie - wat nie so was nie.

Ek was net ellendiglik ongemaklik in my eie vel.

"Ons is almal gebore met een ware liefde... onsself. As jy jouself liefhet, dan sal almal!"

Die fokus van hierdie artikel is Self-Liefde en verduidelik maniere om op jouself verlief te raak en maniere om daardie liefde uit te spreek.

Miskien is jy soos ek en sien die skoonheid in ander mense. Ek hoop nadat jy hierdie artikel gelees het en rond gespeel het met die verskillende konsepte, jy jou eie unieke betowering net so maklik sal sien!

Stap Een:
Wat vind jy innemend omtrent jouself? Wat het jy lief omtrent jouself?

Dalk het jy hierdie vraag nog nooit voorheen gehoor nie. Jy sal dalk liewer wil dink, "Wat kan ek verbeter omtrent myself?" maar ons bêre dit eers tot later. . Elkeen van ons is uniek op betowerende maniere. Sommige van ons besit fisiese skoonheid, sommige is artisties, sommige het die IK van 'n genie, sommige is ontsettend sterk, ens. Sommige van ons het miskien "minder duidelike" eienskappe, maar op 'n aardse vlak speel elkeen van ons 'n belangrike rol met die kwaliteite wat ons verpersoonlik.

Ons is spesiaal. Ons almal word benodig. Ons is betowerend!

Neem 'n oomblik en skryf neer wat jy omtrent jouself lief het.

1. .........................................................................

2. .........................................................................

3. .........................................................................

4. .........................................................................

5. .........................................................................

6. .........................................................................

7...........................................................................

8. .........................................................................

9. .........................................................................

10. .........................................................................

11. .........................................................................

12. .........................................................................

13. .........................................................................

14. .........................................................................

15. .........................................................................

Loop na die spieël, kyk diep in jou oë en sien of daar iets is wat jy tot nou nie opgemerk het nie. Vra 'n getroue vriendin vir hulp. Dink aan 'n tyd toe jy regtig vol self-vertroue gevoel het en skryf daaroor. Dink aan jou 'snaaksighede' wat jou vir jouself laat lag. Jy het vele wonderlike fasette - sien hulle raak!

Dra hierdie lys vir 'n paar dae saam met jou, en elke keer as jy jouself inspireer met jou uniekheid, sit dit by jou lysie. .

Teken aan enigiets wat jou aandag trek omtrent jouself... miskien laat jy altyd iemand voor jou gaan in verkeer, miskien glimlag jy vir vreemdelinge, miskien haal jy kwotasies aan in gesprekke en laat almal dus lag.

As jy dink aan Die Wet van Aantrekkingskrag wat sê, "ewebeeld trek ewebeeld", as jy jouself ten volle lief het, sal dit weerspieël word in diegene met wie jy in aanraking kom.

Ek neem aan hierdie is 'n moeilike taak vir meeste mense. Ons word dikwels geleer om nie ons eie beuel te blaas nie. Ek kan jou verseker niemand het nog 'n arm gebreek deur hulself op die rug te klop nie!

Die doel van hierdie oefening is om maar net te begin. Ek glo dat teenwoordigheid 85% van alles is.

Wees teenwoordig vir jouself deur jouself lief te hê. Begin vandag!

Stap Twee: 
Werk liefdevol met enigiets wat in die pad staan van totale, passievolle Self-Liefde. . As jy dalk in jou spore gestop is deur Stap Een, ondersoek dit 'n bietjie meer. Vra jouself, "Wat staan in die pad van om myself totaal lief te hê?" en vereer dit wat te vore kom.

Dis dalk net 'n ou oortuiging in jou onder-bewussyn - dalk is dit iets groter.

Vir my, voordat ek pens en pootjies in self-liefde kon induik, was dit dat ek eers my eie storie moes verstaan, wat 'n trauma van my kinderdae ingesluit het en wat ek onderdruk het. Totdat ek dít erken het, en derhalwe opgeklaar het, het ek soos 'n halwe persoon gevoel, wat sin maak aangesien daar so 'n groot stuk van my lewe weg was.

As iets vir jou tevore kom, klein of groot, kry ondersteuning vir jouself. Dit help geweldig met die opklaring van ongedane sake van die verlede.

Stap Drie:
Vier Self-Liefde met Self-Sorg.

As jy 'n geliefde in jou lewe het, is ek seker jy het vir hulle 'n geskenk of kaartjie gekoop vir 'n spesiale geleentheid. Doen jy dieselfde vir jouself?

Self-sorg is 'n verpligtende stap in enige poging of strewe. As jy dit oorslaan, dan gaan dinge gewoonlik verkeerd.

Sonder self-sorg kan jy eenvoudig net nie teenwoordig wees vir ander mense of verpligtinge nie. .

Dit is hoekom die lugrederye aanbeveel dat JY eerste jou suurstofmasker aansit voordat jy andere probeer by staan. As jy nie kan asemhaal nie, kan jy dood eenvoudig niks anders doen nie.

Dink aan alles wat jy vir almal doen. As jy kinders het, dan weet jy die liefde wat jy voel en tot watter lengtes jy sal gaan vir hulle.

Nou gaan tot dieselfde lengtes vir jouself.

Dis hoe eenvoudig dit is!

Wanneer jy jouself lief het en jouself uitstekend versorg, vibreer dit uit na ander. Jy sal gloei! Jy sal reverbireer! Jy sal inspireer!

Mense sal vra, "Wat is anders omtrent jou?" Vertel hulle asseblief!

Wees van diens deur almal te laat weet hoe lief jy vir jouself is. Leer hulle hoe. Hoe meer liefde daar op die planeet is, hoe meer vrede sal daar wees.

Om af te sluit, los ek by jou hierdie inspirerende woorde van Marianne Williamson, wat baie spesiaal vir my is. Ek hoop dit inspireer jou om vandag jou Self-Liefde te ontwikkel en uit te brei en jou eie unieke prag te betree!
- Maree

Let Your Light Shine
Our deepest fear is not that we are inadequate.
Our deepest fear is that we are powerful beyond measure.
It is our light, not our darkness, that most frightens us.
We ask ourselves, who am I To be brilliant, gorgeous,
Talented and fabulous?
Actually, who are you not to be?

You are a child of the Universe.
Your playing small doesn't serve the world.
There is nothing enlightened about shrinking
So that other people
Won't feel insecure around you.
We were born to make manifest
The glory that is within us.
It's not just in some of us; it's in everyone.
And as we let our light shine,
We unconsciously give other people
Permission to do the same.
As we are liberated from our own fear,
Our presence automatically liberates others.
- Marianne Williamson

.

Neem 'n besluit

Goeie dag vanaf Oorvloed!

Vandag wil ek praat oor 'n paar besluite wat ons moet neem om ons lewe op dreef te kry - dis so maklik om die klein dingetjies wat pla sommer maar net so te los vir môre of 'een of ander tyd', en my pa het altyd gesê  "moenie afstel vir môre wat jy vandag kan doen nie".

Neem 'n besluit om ...

... NOOIT OP TE GEE NIE

Elke dag moet jy ’n keuse maak: gaan ek ’n oorwinnaar of ’n slagoffer wees? Om probleme te bowe te kom begin dus by ’n keuse! Ek moet die besluit neem dat ek wíl wen en gaan volhard om my doel te bereik – ongeag wat my omstandighede mag wees.

... ALLEEN DIE MAS OP TE KOM

Bevind jy jouself in ’n situasie waar jy alleen voel en nie weet hoe om die eise te hanteer nie? Jy moet verstaan dat niemand jou gaan red nie, en dat jy self beheer sal moet neem. Probeer om jou emosies te verstaan. Is dit eensaamheid, ’n strewe na perfektheid of dalk skuldgevoelens wat jou onderkry? Of is dit ’n konkrete probleem soos onvoldoende finansies, te min tyd of geen ondersteuning nie?

Sodra jy bepaal het wat die probleem is, moet jy jouself afvra hoe jy beheer hieroor kan neem. Probeer wyer kyk as net die voor-die-hand-liggende. Soms, as ons objektief na ’n situasie kyk, vind ons dat die oplossing reg voor ons oë is. Beplan stap-vir-stap hoe jy by ’n beter plek gaan uitkom en moenie moed opgee tot jy dit regkry nie.

Moet ook nie vergeet dat jy nooit alleen is nie – selfs in jou moeilikste tye is daar Iemand met oop arms, gereed om jou te vertroos en te dra.

... KRITIEK BETER TE HANTEER

Meeste van ons is skuldig daaraan dat ons ander mense se kritiek kop toe vat. Dit kan so erg raak dat jy al die positiewe uitsif en nét die negatiewe agterhou en daarop fokus. Dit word die maatstaf waarteen eiewaarde gemeet word.

Al is kritiek nooit lekker nie, is daar dinge wat jy kan doen om dit beter te hanteer:

•    Neem ’n wilsbesluit om nie onmiddelik op die kritiek te reageer nie. Tree terug sodat jy nugterder na die kritiek kan kyk.

•    Kritiek moet op gedrag, nie op ’n persoon nie, gemik wees. As iemand persoonlik raak, versoek ’n fokus op die gedrag wat onaanvaarbaar is.

•    Onthou dat ervaringe uit jou verlede ’n rol kan speel in hoe jy kritiek hanteer (byvoorbeeld die invloed van ’n baie kritiese ouer).

•    Skryf die kritiek neer en slaap eers daaroor.

•    Maak seker of die kritiek waar is en neem verantwoordelikheid vir dit waaroor jy beheer het. Vra iemand wat jou goed ken, se mening.

•    Sien dit as ’n geleentheid om te leer van jou eie “blindekolle” en kwesbaarhede en te groei in jou menswees.

... DAAI SLEGTE GEWOONTES AF TE SKUD

Elkeen van ons het een of ander slegte gewoonte – te veel eet, rook, wat ook al – wat ons wil afskud. Onthou net, gewoontes vorm gewoonlik geleidelik, daarom sal dit tyd neem (drie tot ses weke) om te verander, maar dit is moontlik deur hierdie stappe te volg: Maak ’n keuse om dit te wíl doen. 

* Verander jou “binnepraat”, want solank jy dieselfde goed vir jouself sê, sal jy outomaties dieselfde goed doen. 

* Visualiseer hoe jy dit regkry om die nuwe gedrag uit te leef. Hoe duideliker jy dit kan visualiseer, hoe groter is die kans dat jy sal volhou. 

* Gee vir jouself erkenning elke keer wat jy suksesvol die ou gewoonte oorkom. 

* Dit help baie indien iemand anders weet wat jy probeer bereik en as ’n ondersteuningstelsel kan optree. 

* Sit ’n prentjie, aanhaling of grafiek êrens op waar jy dit elke dag kan sien om jou te herinner aan dit wat jy wil bereik. Dit moet die positiewe nuwe gedrag of gewoonte voorstel.

Onthou, jy kan die ou gewoonte verander as jy dink jy kan!

... ’N KLA-KOUS OP SY OF HAAR PLEK TE SIT

Die beste manier om van ’n kla-kous ontslae te raak, is om te begin kla voordat sy die kans kry. Kan jy jou haar skok indink as jy wegtrek met: “Ja jong, die land is besig om in die afgrond te versink. Een van die dae gaan ons soos Zimbabwe opeindig. Die petrolpryse is verskriklik, die voedselpryse is angswekkend ... Ons gaan dit nie maak nie, veral nie met al die klakouse rondom ons nie”.

Ek is seker die persoon sal vir ’n oomblik heeltemal vergeet wat rondom haar aangaan. Jou laaste stelling behoort haar skok in saamstem te verander, en dit behoort haar tot nadenke te bring.

Die waarheid is dat almal maar ’n geneigdheid het om so nou en dan te kla. Dis geoorloof as jy die volgende reël toepas: Jy mag net drie keer oor dieselfde ding kla. Doen dan iets om die situasie te verander, of besef dat jy niks daaraan kan doen nie en kom oor dit (met ander woorde, hou op kla daaroor!) Wat help dit in elk geval?

... JOU DROOM TE BEWAARHEID

Moenie dat jou drome wensdenkery bly nie – ontwikkel ’n duidelike prentjie daarvan. As jy nie weet wat jou droom is nie, sal jy mos nooit daarby uitkom nie. Skryf jou droom neer en sien in jou gedagtes hoe dit stapsgewys ’n realiteit word.

Gaan oor tot aksie, anders sal jou droom doodgebore wees. Iemand het eenmaal gesê die beste manier om jou drome waar te maak is om wakker te word! Min mense het die moed of wil om daardie warm plekkie te verlaat en moue op te rol om te begin werk. Dit gaan beplanning (’n vaste doelwit het ’n spertyd), innerlike motivering en toewyding kos. Maar hou jou oog op die einddoel.

Jy moet uit die staanspoor weet dat daar terugslae gaan wees op pad na die vervulling van jou droom. Glo in jouself en weet dat jy tot alles in staat is deur Christus wat jou krag gee.

... VREDE TE MAAK MET DIE OUDERDOM

Dit voel soos gister toe jy 20 was! Maar die liggaam wat protesteer as jy trappe klim, die wilde grys haar wat uit die niet verskyn en die fyn lagplooitjies om jou oë verklap dat jy definitief nie meer 20 is nie.

Vrede met jou ouderdom begin by die vrede wat jy ervaar oor die lewe wat jy tot dusver gelei het en die hoop en drome wat jy vir die toekoms het; die vermoë om in die “nou” te leef en elke oomblik te koester. Jou verantwoordelikheid is om die beste “jy” te wees gegewe dit wat jy ontvang het. Deur na jou liggaam te kyk en reg te eet, genoeg te slaap, te oefen en te ontspan en dikwels met oorgawe te lag, kan jy van binne straal – en dít oorskadu gewoonlik meeste tekens van die ouderdom.

... TE SÊ HOE JY VOEL SONDER OM SEER TE MAAK

Vra jouself hoekom jy seergemaak voel. Dalk het dit nie te doen met dit wat die ander persoon gesê of gedoen het nie, maar met ’n seer uit die verlede waarmee jy nie gedeel het nie.

Solank jy bly by hoe jý voel sonder om die ander persoon te beskuldig, is jy op die regte pad. Vermy uitdrukkings soos “Jy het my gevoelens seergemaak” of  “Jy het my beledig toe jy gesê het ...” Sê eerder: “ Ek het seergemaak gevoel toe jy ...” of “Ek het beledig gevoel toe jy ....” Dit neem onmiddellik die fokus weg van die ander persoon en plaas jou gevoelens op die tafel.

Onthou, ander maak ons nie seer nie; ons kíés om seergemaak te voel.

Soms sê en doen mense dinge uit onkunde. Vind eers kalm uit wat die persoon se bedoeling was, haal diep asem en verduidelik dan presies hoe jy oor dinge voel.

 

... NIE OOR ALLES TE STRES NIE

Vir baie vroue het kommer ’n leefwyse geword. Selfs klein dingetjies veroorsaak dat hulle angstig en gespanne raak. Hulle vra heeltyd die vraag: “Wat as ...”

Die realiteit is dat daar dinge in die lewe is waaroor ons geen beheer het nie. Dit maak nie ’n verskil hoeveel jy daaroor stres nie – dit gaan in elk geval gebeur! Deur chronies bekommerd te wees oor jou man en kinders beperk jy uiteindelik jou eie vermoë om jou emosies te hanteer.

Die hartseer is dat ons onsself moeg maak deur bekommerd te wees oor dinge wat meestal nooit gebeur nie. Ons mors al ons emosionele energie daarop.

Sit terug, haal diep asem, aanvaar die feit dat dinge soms verkeerd loop, hanteer dit soos dit kom en probeer om nie al jou tyd en energie te vermors op bekommernisse waaraan jy in elk geval niks kan doen nie.

... DIE TRAUMA VAN GEWELD TE HANTEER EN TE OORKOM

Jou eerste gewaarwording is verlies. Iemand het jou persoonlike spasie binnegedring, jou lewe bedreig en jou besittings geneem. Die skok het ook ’n groot impak op die chemiese balans in jou brein en kan die funksionering daarvan nadelig beïnvloed.

Dit is belangrik om nie in ’n negatiewe spiraal vasgevang te word nie. Probeer om nie die groter prentjie mis te kyk nie. Kies om doelbewus te soek na positiewe dinge. Waak daarteen om nie jouself te isoleer nie. Omring jou met mense wat realisties positief is en daar is vir jou. Gee jouself kans om deur die trauma te werk. Moet dit nie onderdruk en aangaan asof niks gebeur het nie, anders gaan jy later, met baie meer moeite, jou emosies moet hanteer.

Dit kan ook help om met ’n professionele persoon te praat of joernaal te hou van jou emosies.

Kom ons neem daardie besluite VANDAG en mag ons reistog genotvol wees!

Groete,

MAREE

Waarom straat

Ek vind myself soms wandel, op 'n ou bekende pad.
Die straat se naam is Waarom,
op die doodloopstraat Vir Wat.

.

Dan vra ek goed soos hoekom,
hoekom nou juis ek?
Wat gaan ek ooit bereik,
behalwe daardie ses-voet-onder plek?

.

En na 70 jaar van harde werk, my prys... grys hare.
gebreekte skaniere en geheue verlies van my vroeë jare.
En toe ek so eendag wandel, kom 'n gawe man nader,
met klomp van daai sakkies wat ons as kinders kon vergader.

.

Daar was sakke vol 'geluk' en tasse vol 'vreugde',
eienaardig genoeg daar was geen 'teleurstel' of 'vrese'.
Op sy gesig, 'n glimlag wat spontaan ontwaak.
En wonder ek in stilte wat hy met als wil maak.

.

Die man het geen rykdom - die sien ek aan sy drag,
maar sy breë glimlag, 'n oase van sy mag.
En so uit die bloute sê die ou: jy mag ook maar kry,
siende hoe meer ek gee... sewe maal kry ek altyd weer.

.

En vir daardie straat is ek dankbaar, my antwoord is ontdek.
Soms wandel ons in strate, op ons eie verdwaalde plek.
Maar dis in hierdie strate wat ek vind, ek myself weer ontdek.
En my vreugde en vervulling is om ook weer te gee,
want in gee vind ek ook my vreugde elke keer weer en weer.

Karen Beytell

.

Hierdie is 'n Tyd van Ontwaking

Hierdie is 'n tyd wanneer die mensdom, meer as ooit te vore, in staat is om vibrasionele gerigtheid te vind met hulle eie begeertes—in hulle eie tyd/spasie realiteit—en te begin manifesteer dít wat vorige generasies drie of vier of tien generasies geneem het om te manifesteer. Die vorige generasies het allerhande kontrasterende ondervindings gemanifesteer waardeur ons vandag baat vind.

Hulle het geboorte gegee aan hulle begeertes, maar omdat hulle so vasgevang was in die vibrasionele patrone en kondisies van hulle tyd, het min van hulle hulself toegelaat om voordeel te trek uit hulle eie begeertes.

Maar vandag wéét ons, verstaan ons, dat dinge nie net toevallig gebeur nie. Ons verstaan dat, deur die gedagtes wat ons dink, trek ons sekere dinge na ons aan, goed en sleg, en alles wat ons ondervind het gewoonlik 'n les wat gepaard met dit gaan en dis hoe ons verder vibrasioneel ontwikkel en verbeter.

.

Voorspoedige Nuwe Jaar 2016

♥ ♥ ♥ ...•*¨*•♫♪♥
╬═♥╬
╬♥═╬
╬═♥╬ Volg jou hart hierdie jaar! ♥
╬♥═╬
╬═♥╬♪♫ •*¨*•... ♥ ♥ ♥

.
.

Ons Afrikaanse skryfwerk

Vandag wil ek jou vertel van die pragtige skryfwerk in 'n groep waaraan ek behoort op RedBubble. 

Elizabeth Kendall se digbundel Huppel op die Hoogland

’n Baie belangrike en interessante aspek van ons groep is ons Afrikaanse skryfwerk kategorie onder Writing. Ons groep het waarlik baie talentvolle skrywers en hier kan jy goeie Afrikaanse skryfwerk in alle genres beleef – ons het iets vir almal.

Ek hou van lees. Ek hou van die gevoel wat die lees van boeke my gee. Ek hou daarvan om ’n boek wat ek vir die eerste keer in my hande hou, oop te maak en dan my gesig daarin te laat sak om te ruik hoe dit ruik. En dan dwaal my gedagtes na die proses agter die boek – die ure wat die skrywer daaraan spandeer het, die maande en partymaal jare se naslaanwerk, die interaktiwiteit tussen die skrywer en die uitgewer. En ek kry ’n gevoel van verwondering en eerbied vir sulke toewyding en talent…
Ek het baie maal al gewonder, “wat maak ’n goeie skrywer?” Met ’n bietjie naslaanwerk het ek op ’n paar wenke afgekom :

1. Lees, lees, lees.
2. Skryf enigiets, maar skryf elke dag. As jy ʼn kampioentennisspeler wil wees, oefen jy gereeld. So ook met skryf.
3. Skryf is luister en kyk. Hou jou ore en oë oop. Wees nuuskierig.
4. Elke skrywer het ʼn unieke stem. Ontdek jou stem, ontwikkel dit en bly daarby. As jou stem regtig goed is, sal jy gepubliseer word.
5. Herskryf tot sewe maal, indien nodig. Versorg jou skryfwerk tot dit eksie-perfeksie is.
6. Hou aan probeer. Moenie dink jy is te jonk of te oud om te skryf nie.
7. Almal het tyd om te skryf. Dit neem een minuut om ’n sin te skryf.
8. Skryf oor dit wat jy ken, of ervarings wat na genoeg aan jou eie ervarings is.
9. Bly getrou aan daardie passie ten spyte van moontlike terugslae.
10. HOU NOOIT OP MET SKRYF NIE!

Ek sien op Facebook het die Boekrakkers van die Lekkerlees Boekrak almal foto’s van hul werkplekke geplaas. Al wat leef koekeloer nou of hulle iets op daardie uitstekende skrywer se lessenaar sal kan opmerk wat, as hulle dit sou nadoen, dit vir hulle net dalkies so ’n bietjie van daardie glorie sal bring.
Baie groot skrywers poseer agter op hulle boeke in hul studeerkamers waar die groot meesterstukke gebeur. Jy gryp ’n vergrootglas en kyk of jy kan sien presies watter naslaanwerke daar op die boekrak agter die lessenaar is wat jou dalk kan help om ook soos hulle te kan skryf.

Voel jy dat ’n indrukwekkende studeerkamer of die rakke vol goeie naslaanwerke en die beste tegnologie tot jou beskikking eendag van jou ’n puik skrywer gaan maak?

Hier volg ’n paar voorbeelde van wat jy daar in ons groep kan ervaar :


Skadu by Rina Greeff


Hadeda Ibis by Elizabeth Kendall

’n Nuwe dag
‘n hadida skeur die nag se swart in twee
ver dreun ‘n motor op die teer
en ek sluk warm koffie
uit my boepensbeker
stadig vou die dag sy ligblou lakens oop
die mossies kwetter en vinke fluit
dorpsduiwe koer-koerdoek nog ‘n keer
as Maandagmôre goue sonstrale begin strooi
oor die liggroen van my Ma se akkerboom
en oor ons huis, so lou en loom
- Elizabeth Kendall ©


Electricity Pylon by DebbyTownsend

Die Weerkaatsing
Jy het saam met my ‘n gedagte geword, saam is daar aan ons gevryf en geverf. Toe Hulle klaar met ons gespeel het, het glas ons geskei.

Ek het jou beny, daar binne die skoon blink glaskas, want niks kon aan jou raak nie. Somerduiweltjies het nie jou wange drooggebraai nie, en Winterasems kon nie jou goue hare slierte maak nie. Almal het jou bewonder, elke Sondag na jou kom staar, want stof het nooit jou oë laat traan nie.

Die traan was altyd daar, die blink het dit net baie goed weggesteek, maar in die maan se sagte glimlag het jou blink verdwyn en het ek vanaand vir die eerste maal die seer gesien…

My seer vee ek met ‘n sakdoek af, lees ek met ‘n sprokie weg, maar jou silwer traan sal vir altyd jou wit wang versier. Môre sal ek weer kan glimlag tot dit seer word, maar wie lag as hartseer in jou ingebrand is?

Waarom maak hulle “altyd” so lank, nou so kort?

Netnou kon jy amper glimlag, want die glas was blink en jy was ek…

… maar hier in die maan se sagte stem hoor ek jou lag met pyn, want porselein is veel kouer as venyn. Ek beny jou nou deur ander se oë omdat ek in my hart kon sien hoedat jy vry wil wees. Hulle weet nie hoe graag ‘n harlekyn wil glimlag nie, vrolik wees en vlieg nie.

Dan kan ek asemhaal…
Maar jy…
As jy nie kan lag nie
Kan jy nie lewe nie.
- Joanne Sandoval


Kontrei Kiekies – Oupatjie op die stoep by Rina Greeff

Bosbede
Ek wil so graag vir jou
die môredou se kieliespoor
in ’n web vasvang -
uit my mond se silwer grot
’n skitterdraad spin
wat net vir jou sal blink
en waaraan jou voete
nie sal kleef nie.
Ek wil pangapaadjies kap,
sodat niemand wat onversigtig stap
dalk die fyn spinsel
sal breek of versteur nie.
Ek wil so graag vir jou
die wind
deur watervaltakke se ruis,
knipperlig
en die plonsglimp van vin
vir jou gewyde oë wys.
Ek wil met ’n naaldekokerlyfie
flitsend om jou bene dans
en geel en pers geblaar
jou lyf mirrerank.
Ek wil so graag
die maan se trom
tot by jou vuurtjie bring
en saam met jou
die geheimenis
van verborge lewe
in ’n hol wilger vind -
dit heilig voel klop
teen my bors.
Ek wil so graag jou oë poel
teen die hang van gladmaag rotse
en myself was
in jou klippertjie filterstroom,
sodat ons weer skoon -
in vernuwing gespoel,
die blou van vrede
kan asem.
- vanitastic


Canna indica by Elizabeth Kendall

Winterwoorde
Winter is bruin kannas teen die buitemuur. Winter is woorde in wasemwolkies. Winter is handskoenhande en warm serpe. Winter lê wit in die tuin tussen koue klippe en vaal gras.
Winter wag vir niemand nie. Dit kom by die voordeur, die oop vensters en die sleutelgat ingewaai. Dit kom klim in jou bene, jou stram vingers, jou kaal ore. Dit kom kielie jou ruggraat, jou nek, jou tone. Winter kom vat aan ‘n mens se lyf.

Winterkos is warm kos: boontjiesop en murgbene, bekers Milo en stomende koffie, kerriekos en warm brood, varsgebak met regte botter en druiwekonfyt, dikgeplak.

Winter is pannekoek met baie kaneelsuiker en saans ‘n slukkie sjerrie, sommernet.

Wintersklere is toemaakklere: wolsag en warm, nog ‘n mou, laag op laag soos die tydskrifte sê. Winter is ‘n kniekombers van sybokhaar, ‘n gansdonsduvet oor die bed, ‘n warmwatersak vir koue voete, wonderlike lugreëling in die voorste kamer.

Winter is omgee, dis uitdeel aan mense wat bewend op straathoeke staan met honger oë. Dis nog ‘n dik Koöperasiesak-sak in die hond se hok. Dis ‘n ietsie ekstra vir die getroue ou tuinjong. Dis rondkyk na nood om jou. Winter is troos in ‘n stukkie brood of ‘n ekstra kombers, grys soos die winterlug vanself.
Winter is mooi op sy eie manier: kaal silhoeëttakke teen ‘n ysblou lug, tortelduiwe wat wag dat die ys water moet word in die voëlbak langs die bamboesgras. Kinders wat hande vashou en touspring, hul serpe waaiend in die wind. Bruin blare wat stadig grond toe val en doodstil bly lê. ‘n Gesellige vuur in die kaggel: knetterend, knus.

Maar winter is ook hoop. Wanneer alles morsdood gevries en yskoud om jou is, kom lente sommer net weer eendag aangejubel met haar vrolike, helderbont rok. Sy dans oor die bome, die blomme en jou bevrore menswees. Sy huppel en jubel en verf die dae warmgeel en oranje. En sommer so, sonder dat jy dit agtergekom het, het winter stil-stil verdwyn, by die agterdeur uitgesluip en in ‘n ander land gaan nesskrop, baie ver van hier.
Elizabeth Kendall ©


Kontrei Kiekies – Die Wieleman by Rina Greeff

gisteraand het die wind
gisteraand het die wind bolwang geblaas
met sy vuis teen my venster kom raas
verwoed en verward aan ‘n boom gepluk
en rukkend ‘n paar druppels gesnik
hy het eenkant gaan sit en vir ‘n wyl
om die hoek van my huis begin huil
toe ‘n hopie blare bymekaar gemaak
eindelik in die ritsel aan die slaap geraak
© Jan J van Staden


A door to the past by Rina Greeff

Die lewe gaan aan
Die koue wind huil om die verlate hoeke van die opstal en sny deur die alleenlyf mensehopie wat hurkend teen sy aanslae skuil. Dit waai haar hare uit haar gesig en byt aan haar nek en ore, knaag aan die ontblote, naakte vel waar eens, in vergange passie, sy asem warm was. Bleekwit hartseertrane yskristal op haar wange en die hande wat warm aanslae op ‘n lyf kon maak, is in vuisies voor haar mond gedruk. Hulle smoor die snikke wat wil uitbars. Iewers het die vol rondings van haar lyf, wat sy sinne so bedwelm het, verander in ‘n brose, beenmaer mens merk hy op terwyl hy stilstom na haar staar.

Sy lig haar gesig en kyk hom swyend aan. Die blinkbly oë wat hom tot slaaf kon dwing, is nou dowwe nikssiende spieëls wat die onreg en hartseer in sy gesig terugkaats. Geskok snak hy na sy asem toe hy in hulle kyk. Is dit wat van haar geword het? Is dit wat oorgebly het van die vrou wat hom verafgod het? Die vrou wat jare lank saam met hom hierdie grond bewerk het?

Dit voel soos gister toe hy haar met trots na sy plasie gebring het. Vol beloftes van oeste wat gaan wees en vet jare waarin hy vir haar sou sorg. Haar vrolike lag as sy tussen die lammers is of haar singende stem wanneer sy besig was, het hom altyd moed laat skep. Nooit het sy gekla of iets vir haarself gevra. Net altyd aan sy sy gewerk. Saam het hulle die lug dop gehou vir wolkie wat reën moes bring, saam gejuig die enkele kere wat dit wel sou kom. Saam gejuig oor die seun in die wiegie en ‘n paar maande later saam langs sy graf gestaan.

Hoe is dit dan moontlik dat hy nooit agter gekom het hoe sy vrou onder sy oë wegkwyn nie? Was hy dan werklik so besig om ‘n verlore stryd te stry dat hy van haar vergeet het? Hy het wel opgemerk dat sy stil word, dat die musiek verdwyn. Hy het opgemerk dat sy nie meer vrae vra nie. Heimlik was hy verlig, want nou was dit nie meer nodig om kortaf antwoorde te blaf nie. Hy kon maar net swyg en treur.

Hoe meer hy dink, hoe duideliker weet hy nou dat die tekens reeds lankal daar was. Sy vrou wat nooit ‘n rit dorp toe gemis het nie, het skielik allerhande verskonings gehad hoekom sy nie kon saamgaan nie. Sy het nie meer gaste oorgenooi nie. Selfs Jan, die plaashulp het nou die dag gevra hoekom mevrou so alleen bly en met niemand praat nie. Hy het dit as moegheid voorgehou. Jan se antwoord op sy vraag wat Mevrou dan doen as hy dorp toe gaan, was nie vir hom vreemd nie. Mevrou sit by die graffie van die baba Meneer, dan gaan sy huis toe en niemand sien haar nie.

Terwyl hy na die hopie mens voor hom kyk, voel hy die selfverwyt. Hy was so vasgevang in sy stom hartseer oor sy kind en die plaas en die droogte en die gesukkel dat hy nooit sy vrou beskerm het nie. Nooit gedink het dat sy ook treur nie. Dit was dan sý seun, sý erfgenaam vir wie hy die plaas opgebou het. Na die kleintjie se dood het hy soos ‘n outomaat deur sy dagtaak gegaan. Gedoen wat hy moes, maar nie met die vuur van vroeër nie. Daar was geen sin meer in nie.

Die droogte het die laaste oes tot stof verdor en die diere moes verkoop word. Hy het nie meer omgegee toe hulle die plaas ook moes verkoop nie. Net stom gestaan en kyk hoe sogenaamde vriende skynheilig simpatiseer en dan met winskopie pryse sy besittings as eie opeis. Nadat die laaste mense vertrek het, het hy na haar kom soek en nou kyk sy vrou met dooie oë na hom, steek die stil verwyt soos dolke in sy hart. Dis net hy en sy en die huis op die dorp wat wag.

Stadig staan sy op en sonder om te praat, stap sy by hom verby. Hy kyk haar agterna toe sy by die graffie stilstaan, sien iets blink en hoor die knal. Hy sien hoe haar liggaam slap oor die graf val, sien hoe die rooi bloed die spierwit steen vlek. Dan sak hy inmekaar.

Hartaanval vertel die manne aan mekaar waar hulle by die koöperasie oor hom praat. Skuldige gewete fluister die vrouens nydig waar hulle by die tuisnywerheid skinder. Tragiese gebeure sê Mevrou Dominee wyl sy vir Dominee sy middagtee en ‘n koeksister aangee en hy meerwaardig knik. Blink Stefaans bly een minuut stil voor hy sy glasie in die kroeg lig en ‘n heildronk drink op die winskopieprys wat hy vir die grond betaal het. Die lewe gaan aan.
- JuffrouGawie


Serengeti Sunrise by Owed to Nature

Doringboompie
Ons hoor almal oor die nuus van
jou, maar dit dring nie
tot ons vuisvoos verstande
deur nie…
Jy, Willemientjie, roosknoppie,
rooikoppie vermoor, tereggestel
drie jaar oud
Die hartseer stoot in my keel op
saam met die naar van die haat
wat in my opwel, opwel
teen hulle, barbare, moordenaars
van kinders
dan die dankbaarheid, skuldgevoel
dat ons tog weereens gespaar is,
dat dit nie ons fotos in beeld is
nie, dat ons kleinkinders nog
veilig is…
Maar hoe lank, hoe lank Here
gaan ons dit nog gelate aanvaar,
verdra, vuisvoos magteloos en
kragloos?
Ons hoor oor die nuus van
jou, maar ons sug verlig, dankie
tog die nie naby ons nie, ons
ken jou nie, dankie tog……
Daar het n doringboompie by die
pad gestaan,
stammetjie amper middeldeur
wanneer beur ons weer op, wanneer druppel
die gom oor die seer van Willemietjie se
oupa en ouma Here, hoe lank nog,
kragloos?
- Antionette


A lonely fence in Australia by Elizabeth Kendall

Ai tog!
Doringdraad
Maak my kwaad
Die simpel ding
Het losgepring
En ’n onverdiende gat
Uit my nuwe broek se pyp gehak!
Nou strompel ek oor
Nog ’n geploegde voor
En my hart, eens vol moed
Pomp nou net moeë bloed
Want die boer – sonder plan -
Het daar oorkant nóg ’n draad gespan!
© Leoni Venter 13 Oktober 2000

Sintuiglike verlededrome
Die vars gebakte brood
en pangebraaide wors…
borrellende dampe
in my geheue fontein;
Meng dít, met die geur,
vars koffie op die stoof
en Ouma se kombuis
kom na vore.
Vroegoggend geluide
van vrolike voëlgesang
en die hanslam op die werf
Oupa wat wysieloos
loop en fluit – bring opnuut
die onthou in my ore,
herinneringsbeelde
van groen lusernlande;
wit merino’s teen
die berg se hang;
blouselblou hemel
en die rooi sleepwa;
Oupa se growwe hande
omvou my handjies klein;
Die hande van Ouma, so sag
troos die einaplekkies;
koolstoof hitte
teen die winternag se kou;
Dis dié gevoel
wat ek steeds onthou…
Appelkose, perskes,
gemmerbier en romerige melk;
Ouma se melktert op die tafel
en soet patats vanaand…
Smake uit die verlede
toegevou
in my
onthou gedig.
- JuffrouGawie



Ma-wees
Vier kinders is ‘n huisvol. En ‘n hartvol. Mens se hart het vier kamers. Daar’s oorgenoeg plek vir elkeen. Al is hulle lankal al gespeen. Hulle klou vas aan jou soos klitsgras.

Of soos die soet reuk van die verbleikblom. Hulle menswees kan nooit uit jou hartsgedagtes uitgevee word nie. Nie eers deur ‘n wilde orkaan of ‘n stormsterk tornado nie. Hulle sit. Soos toffie aan ‘n wolkombers. Binne-in jou hart vir vreugde of vir smart.

Solank as jy lewe sal jy hulle liefhê, meer as woorde. Jou liefde is om hulle, langs hulle, onder hulle. Jou liefde vir jou kinders is jy. As jou kind seer het, pyn jy in die oortreffende trap. As jou kind bly is, verander jy in ‘n sorgelose siel en geheel die lewe is ‘n stuk saligheid.

Meer as dikwels deel jy jou kinders se doen en late met jou manmaat. Sy skouers is jou vesting, ‘n sterk bastion teen enige onverwagse aanslag. Sou stormwinde jou van koers af wou dwing of vrees jou oorval. Jy spyker jou woordelose kommer in flardes en flenters teen sy omgeehart se mure vas. Want déél maak einas makliker, sagter, beter. Deel maak ook vreugdes voller. Saambid is ‘n toemaartroos.

Soggens bid jy jou kinders op koers. Saans druk jy jou gedagtekombers agter hul rûe vas. Jy is bly as hulle oor jou drumpel trap. Jy jubel as Skype-beelde mense van vleis en bloed word. Iemand aan wie jy kan vat, kan vashou, kan bekyk en beluister. Jou selfoon swyg vir ‘n paar dae, sms’e is nie nodig nie. Jy troos jouself met sagte herinneringe as hulle weer koers kies na hul eie nes.

Jou lewe word ‘n kuierbymekaar met wisselende stiltes tussen-in. Soms lang afwesighede, afhangende in watter kontinent ‘n kind hom bevind. Jy sien jou eie kleuterfoto’s in kleinkinders se gesigte. Jy hoor jou ma se lag in jou kind se stem.

Jy loop haal jou Pa in die hemel en vertel hom iets moois wat ‘n kind gedoen het,
iets wat jou trots en bly en gelukkig laat voel het. Jou gene vloei in die been van jou gebeente en die vlees van jou vlees.

Snags as wakker om jou skouers kom hang, skryf jy liefhêstories en verse oor nabywees.
Oor ma-wees en kindwees. Jou kinders kom klim in jou hande. Met sagte vingers tik jy soet sleutelbordwoorde. Jou liefde vou hulle toe. So lank as jy lewe. So lank as hulle spore op die aarde trap.
Elizabeth Kendall ©


Windpomp in die Karoo by Maree Clarkson

Windpomp
ek luister elke môre
na jou haai hartklop
wat meer en meer
dorre smeke nog pomp
saans is jy stil en jy staar
so asof jy nog wag,
wag vir die liefde se draai
om deur jou hart te waai
© Jan J van Staden

Langs die Pad…
Twee minute na nou, so kwartvoor more, sien ek hom staan langs die pad.

Stormwinde skeur om die hoeke by die kruispad. Daar waar die yskristalvingers van vriendelikheid stomend ‘n ewige stryd voer teen die lekkende vlamme van haat.

Dit is hier waar ek, kort agter hom, dieselfde ure van angs sal moet uitsweet. Hoekom is dit dan so moeilik? Dit is tog so maklik om van hier, die regte keuse te maak.

Nee! Hy begin wankelend die warmte in met vlamme van verwarring wat smeul in sy oë. Hy struikel oor die growwe pad en verdwyn langsaam in die vuurpylrooi gloed van oneindige vrees.

Hoe kan ‘n soldaat, wat sy lewe vir sy land gegee het, die hel se vure verdien? Wat verdien ek, wat elke sent uit die hand van armes geneem het, dan? My bene word weer kleuter, en ek het verleer om ‘n tree te gee. Ek voel die pyn van onsekerheid toe ek opkyk…

Die twee paaie is nie meer nie, maar twee wonings verruis uit die onsigbaarheid van onheil. Blougrys mure van ‘n vervalle ou herberg verdwerg teen die goudrooi glans van ‘n luukse wolkekrabber. Deftige mense met ‘n gloed in hul oë wink vanuit die asemrowendhoë vensters en meteens is ek seker dat iemand soos ek, in ‘n plek soos hierdie hoort. Ek sal nie die lewe verspil met werks-sweet in ‘n vervalle herberg met arme dromende mense nie.

Met my volgende tree omhels die grondpad my hardhandig en ek hoor iemand ager my uitroep. Ek beur orent en kruip vorentoe totdat ek die rooiwarm stoomvingers teen my seer gesig kan voel.
Weer eens ruk die benoude roep my op. ‘n Jong meisie, sowat ‘n minuut na netnou, staan met haar hande voor haar mond. Sy is duidelik ‘n gevangene van vrees, maar nie vir haarself nie. Sy beduie iets, iets na die verlate pad.

Uitasem stoot ek die goue deure oop, maar pyn skiet deur my vingers soos die handvatsel daarteen brand. Toe gee die deur mee, en ek kom op die vloer te lande.
‘n Angskreet laat my opkyk, in die oë van Lucifer.
Agter hom, in die poel van vuur, erken ek hom…
…die troepie langs die pad.
- by Joanne Sandoval

Mañana Afrika
‘Manjana’ beteken “chill out, calm down, take a break…” as jy oor die Karibiese strande lê en uitkyk.
‘Mañana’ is Spaans vir “not today”, “maybe later”, "until tomorrow…”

In Suid-Afrika sê ons: “We unfortunately do not have a word in our eleven languages that express such urgency…”

Dis een ding waarvan ons baie het in Afrika: tyd. Dis ons voorreg. Maar ons weet nie hoe om dit reg te gebruik nie. Oor ons vergeet ons is boorlinge hier, ware Afrikane, nie westerlinge nie. Oor ons vergeet van ons Afrika-son, en ons Afrika kleure en ons Afrika geure, oor ons vergeet om stil te staan en dit net in te neem. As ons, met ons wit gesiggies, soms wonder wat die doel was, dat ons vlugteling-voorvaders ons hier in ‘n godverlate land kom plant het, onthou dan van mañana.

Een minuut diekant toe en een minuut daaikant toe, is leeftyd. Mañana-tyd. Dit is die tyd wat jy kan waarneem wat om jou aangaan, kyk of jy in ander se harte kan insien, of om net bietjie binnekant toe te kyk. Dis altyd waardevolle tyd, enige plek in Afrika, enige tyd in Afrika…

Adem die vars seelug se sproei diep in. Proe die somer sweetdruppels op jou bolip. Voel die Bosveldson se bruin op jou vel. Ruik die besembossies se veldparfuum. Stap kaalvoet in ons rooi Kal’ari-sand. Sit net ‘n bietjie langer stil op een plek en hoor die boom-eekhoringkies se tandjies op krummels knars…
‘n Mañana-oomblik is goud werd.

Die afdak waar die my mansmense werskaf, is fluit-afstand van die spreekkamer af, net anderkant die groentebeddings. Manlief sweis so nou en dan, as dit ‘n stil dag is, wanneer ons tuinboukundige sy graaf of die grassnyer se lem of die sproeierkoppe gebreek het. Of ‘n skuinsplaat maak dat die Jack Russel en die eende nie onder die hekkie deurkruip nie. Sulke goed. En manlief het ‘n grinder, waarmee hy liewer versigtiger moet wees.

Niël het uit sy tienerklere gegroei, en uit sy tekkies uit, en uit sy krieketkolf, en uit sy fiets gegroei. Manlief en Martin “diens” toe die fiets, want dan kan Simson, die tuiningenieur, dit maar kry. Nog splinternuut, die ketting moet vervang word, check die brieke, so aan. Maar die manne se ratte krap so bietjie,dis warm, almal is nie altyd ewe geduldig nie, en Manlief weet ek gaan nou-nou weer vir hom wink, oor die mense al sit en wag.

Terwyl hulle twee stoei om die dinge reg te maak, kom die volgende pasiënt al aan en gaan sit. ‘Fall in line’. En wag. Hulle is op Afrika-tyd. Dis net, as die pasiënte te lank wag, dan skakel ek ongelukkig weer terug na Greenwich-tyd.

Die een windgat pasiënt maak heeltyd opmerkings oor hoe ek moet maak dat die blindings nie skeef hang nie, en oor die lugversorger en hoe ek dit moet en hoe ek dat moet. Klink na ‘n handige een. Hy’s eintlik net hier om gou sy bloeddruk te ‘check.’

“Mister Seseng, you are so clever about everything, do you know anything about bicycles?”

“Oh yeah… I can fix almost everything. Why?”

Nommer Een… om jou stil te kry. Nommer Twee…

“Then maybe, you can go and help the doctor and his son to fix Simson’s bicycle, and then all the patients do not have to wait…”

Ek wys hom waar die twee langs die afdak staan en sweet. Hy staan op, kom loer by die deur uit, kyk vir so ‘n sekonde of twee, en gaan sit toe weer ewe rustig. Hy sal liewer wag.

Almal kyk hom vraend aan. Hy trek net sy skouers op.

“No-o-o-o-o… let them bond…”
- filiola

Fortunata
“Wat het Pa dan gedink? Het hy ooit gedink… die goed is soos snot!”

Hy marsjeer kniediep deur die stinkende moddermoeras, swaai ritmies en oordadig soldaterig met sy tiener-arms.

“Seker: Ek… kan…hier…deur… Ek…kan…hier…deur… Ek… kan…hier…deur…”

Ons grinnik net oor Niël se grootbek. Dis net oor hyself tot by sy knieë in die gemors is.

So vyfuur se kant het Stoffel ons almal in vroulief se Toyota Fortuner genooi, hy gaan ons die plaas wys. Hy wil eintlik vir ons die ‘weir’ gaan wys. Ek’t maar later uitgevra, gehoor dis ‘n keerwal.

Ons het al met die landmeter se oopstootpaadjies gery. Hulle wil ‘n gedeelte langs die plaas aankoop, so 100 morg. Daar is ook ‘n spruit, wat goed sal wees. Stoffel sal graag wil weet hoeveel water is nou al agter die keerwalle opgedam, met die onlangse reën. Op die bestaande plaas is gevestigde macadamias en koejawels. Tussen-in bly hulle besig met broodbome kweek en hy maak unieke meubels van ‘sleeper’hout. Wil nog ‘n paar honderd vrugtebome aanplant. Soos wat die mark bepaal.

Soos ons deur die mini-dongas boendoe-bash, vul die veldparfuum van bloekom, wilde dagga, lantana en kakiebos die lug.

Die paddas begin krakerig kwaak.

Hulle wys ons waar die koedoes die jong boompies se groeipunte afeet. Dis skade.
Stoffel het voor die spruitjie stilgehou.

“Gaan kyk maar eers…”

Kom hier vanuit die agterste sitplekke. Hy gaan kyk. Loop tot anderkant en terug. Klim met sy modderstewels terug in vroulief se nuwe bakkie. Hy lyk tevrede. Vroulief lyk minder tevrede. Ons ry deur. Halfpad deur. Die Fortuner sak met ‘n sug in die borrelende modder van die bedompige rietspruit in. Tot gelyk met die trapplate aan die sykante van die bakkie…
“Reverse!”

Dit werk nie.

Dit begin skemer raak.

Ons stadsjapies gee allerhande wenke wat ons eens op 4×4-kursusse oor ‘recovery’ geleer het.
Dit werk nie.

Charmaine gee haar man se selfoon vorentoe aan. Die battery is pap. Sy gee haar foon vorentoe. Aan die einde van ‘n lang werksdag op die plaas, is haar foon se battery ook papperig. Hy kry nie antwoord nie. Stuur die foon weer terug agtertoe, sodat Charmaine kan kyk of sy vir Niël in die hande kan kry.
“Sê vir hom hy moet die bakkie bring, en drie biere en die boot se tou. Van die ‘Dos M’ wat ons van Mosambiek af gebring het.”

Die boer en sy stadsjapie-vriende durf die modderasie aan.

Steeds nie antwoord nie. Sy probeer vir Sussa bel sodat sy haar broer die boodskap kan gee. Die kinders is seker voor die TV of op die rekenaar. Of lê op die selfone. Koshuiskinders kan nie naweke sonder hulle vriende klaarkom nie. Toe probeer ons vir Willie bel sodat hy sy niggie in Witrivier kan Mxit van Pretoria af. Dat sy haar Ma moet bel.

Niël is ‘n uur later op pad met die bakkie. Die drie dorstige mans reken ons vroumense moet uitklim, en dan saam met die kind terugry huistoe. Ons sê ons sit net hier. Eerstens, daar is kniediepte moerasmodder. Ek sien al hoe abba hulle ons, soos Jan van Riebeeck se slawe die vrouens aan land gedra het. En tweedens, wie wil nou al hierdie sports mis?

Niël-kind kom in die skemer na ons toe aangestap. Die Toyota Hilux het net om die draai vasgeval. Presies daar waar hy laasweek met sy veldfiets vasgeval het. Al die manne pak ‘n tekkie. Kom later bedees terug. Hulle kry nie die bakkie uit nie. Dit het nou nog verder vasgeval, hang sommer so skuins.
Stoffel bel teen sy sin vir Danaman. Hy weet sy broer gaan nie beindruk wees as hy hom vra om die trekker te bring nie. Boet Danie blyk in ‘n goeie bui te wees. Ons hoor dofweg hoe hy iets sê soos, dat hy dit graag sal wil sien. Hy’s op pad.

Hy kom daar aan met die Ford Ranger.

Die manne haak die boot se tou en die enjins begin dreun. Blou rookwolke en stoom borrel.
“Dit was my nuwe ankertou!”

Die Fortuner het nie ‘n millimeter geroer nie.

“Kom ons gaan kry die trekker…”

Niël-kind ry saam met Danaman.

Toe is dit net ons, die blinde Laevelddonkerte, krieke en ‘n paddakoor.

Kobus shloff deur die modder, kom staan bakhand by Cristelle se venster en maak versigtig sy hand oop. David roep van anderkant die wal af, dat ons by die vensters moet uithang en bokant die voertuig kyk.
Vir enige mens, of dit kind of grysaard is, is die sig van vlamlyfies ‘n gedagteflits terug na ‘n wêreld van fantasie. Wat jou wegneem uit die werklikheid…

Hierdie kewertjies kom in die lente uit, bly ondergronds, onder boombas of in natterige, klam areas. Soos vleie, spruite, poele, bosse, woude en moerasse. Sommige spesies kan onderwater leef. Hulle is meestal jagters: eet wurms, slakke, miere, motte en selfs spinnekoppe. Ander leef slegs van stuifmeel en nektar.
‘n Volle 100% van ‘n vuurvliegie se lig word uitgeskei as lig. Dit is ‘koue lig’. As mens dit vergelyk met ‘n elektriese gloeilamp, is slegs 10% van die energie lig waarvan 90% van die energie verlore gaan in hitte.
Elke vuurvliegspesie het ‘n unieke flitspatroon. Dink net, daar is sowat 2000 spesies!

Die sirkeldans van die vuurvliegies, wat met hulle geheimsinnige morsekode ‘n boodskap uitstuur. Met ons in die magiese middel…

“You would not believe your eyes
If ten million fireflies
Lit up the world as I fell asleep
‘Cause they’d fill the open air
And leave teardrops everywhere
You’d think me rude
But I would just stand and stare…”

Die Ford-trekkertjie kom brullend oor die bult. Niël sit op die modderskerm en hou die ‘spotlight’ vas. Danaman het die trekker se hoofligte lankal afgehaal, hy sê ‘n boer werk in die dag.

Hulle stuur ons vroumense vooruit met die Fortuner om die aartappels in die oond te gaan red. Gaan gou die Hilux ook uitpluk. Dan sal hulle die braaivleis op die kole kom gooi en nog ‘n paar Dos M’s afsluk.
Plaasjapies vergeet soms baie belangrike belewings as hulle stadsjapies word. Soos die vrede van vuurvliegies.

En dat ‘n boer niks van ‘recovery’ hoef te weet as hy ‘n trekker het nie !
- filiola

Kersfees 1985
Kersmiddagstap in Eerstelaan…
met poeierpienk kreukelbome
donssag blare
van bome wat droom
denne wat ruisend praat
blink water
- ’n yl stroompie versteek in groen gras -
stapels grysblou wolke
voëlvlugte
wat by al die vredigheid pas
en die helder klanke
van gelukkigweeslag
saam met die son se dans
in die blink van jou oe"
vandag toe jy hier by my was!
- Santie Amery

Briewe aan buurvrou #1 – antionette
September sing ‘n lied – Elizabeth Kendall
Blou herinnering – Pieta Pieterse
Stom – Karen01


’n Grys hadeda by Elizabeth Kendall


Leucauge festiva by Rina Greeff

Spinnekop Opskop
Toe ek so salig stadig ontwaak,
val my vakerige, vrede-
met-die-wêreld-oog
vol op die harige homp
van agt, aaklige bene,
‘n lelike lyf en kop; so doodstil,
uitdagend vas daar teen die kas.
Dromend lê ek; sê ek sagstem: “Sa!”
in die oor van diegene
wat die ‘Sa!’ moet hoor;
en terwyl die honde doen wat
‘Vat hom; vang hom; vreet hom!’
vir honde laat doen met hulle ma
se hitsige sê van ‘Sa!’, droom ek
ewe vroom, vol vere op die oor
wat niks van niemand wil hoor,
die vroegmôre voort.
Later, toe die sonlig skyn daar
waar dit behoort te skyn
op dié vreedsaam vakansiedag,
voel ek effens skuldig,
‘n skrapsie, net ‘n bietjie swynagtig;
versamel maar stukkies vir stuk
in sneeuwit snesies, been vir been,
poot vir…; ag wat, halwe poot,
en dra dit dodemarstreë vir tree,
honde op die hakke,
uit na buite na die drom waar
die sagte gedruis van die muggies-
muskietgespuis en vlieë-vlerkies
die oorskot oordadig verwelkom
in hulle ga-gogga se heiligdom.
Ek klap dié kis van rus
se deksel dramaties toe;
sê sedig en sielvol
die tatta-gogga-begrafnisrympie op:
“Jy was gewaarsku…:
mý wêreld is jou woning nie!”
en spinnekop se been en ses, én
‘n halwe een
gee die heel laaste spartel-skop.
- Rina Greeff ©


Gebonde by Rina Greeff


Wintergedagtes en drome by Elizabeth Kendall


Sy duifie by Rina Greeff


Nostalgie by Elizabeth Kendall

.

’n Geseënde 2015 Kersfees!

‘n Bos vol genade toegedraai met Vreugde en gelint met Liefde en Vrede word jul toegewens vir hierdie feesseisoen!

Hoe wonderlik!

om ...

vanoggend by die venster uit te kyk.
die duifies te hoor koer.
buite te loop en die son op my gesig te voel.
iemand 'n lief-drukkie te gee.
te glimlag vir 'n vreemdeling.
iets gaafs en onverwags te doen.
te luister.
diep asem te haal.
geduldig te wees.
in die donker te sit en die Kersboom te geniet.
geskenke toe te draai met liefde in plaas van ongeduld.
te gee.
meer te gee.

Nie geskenke nie, liefde.

Kaalvoet in die reën

Na die eerste heerlike reën van die seisoen, is dit vandag 'n pragtige blou, koel somersdag en my gedagtes gaan terug na my jong dae in die laat 1950's toe ons as kinders na elke reënbui buite in die waterpoele gaan speel het, kaalvoet en sonder sorge. Uitbundig gelag en mekaar met die water bespat en dit het nie saak gemaak dat ons vol modder geword het of dat ons klere besmeer was nie (daar was mos ordentlike "Surf" in daardie dae) - en in daardie dae is ons gedurig aangemoedig om buite te gaan speel.

En eintlik het ons nie 'n ander keuse gehad nie - geen TV, geen rekenaars en geen selfone of X-box nie, ons moes ons self vermaak. Hop-skotch, kennetjie, leap frog, draadkarretjies wat ons self gemaak het en rond gestoot het op "dorpstrate" wat ons in die sand gemaak het, vlieërs gevlieg, bome geklim en gespeel ons is Tarzan, veldblommetjies bymekaar gemaak om huistoe te vat vir Ma is maar 'n paar van die goed waarmee ons onsself besig gehou het.

En dis hoe ek vroeg vanoggend gevoel het, lus om kaalvoet in die poele water te plas. Of 'n vlieër in die sterk briesie te vlieg. Ek het my pantoffels in die huis gelos en kaalvoet oor die gras geloop na die reënmeter om te sien hoeveel ons gehad het. Gisteraand se stormagtige 28mm reën het die aarde goed gedoen, en my siel ook. Dis sommer asof al die spinnerakke weg gewas is tesame met die verskriklike hitte wat ons die afgelope weke ondervind het. Die dor aarde verdor sommer jou menswees ook, maak dat jy lus is vir niks. Ek kon aan niks kom nie en was net so verlep soos my Krismisrose. Maar nou staan hulle almal weer regop, verfris na daai hemelse water en

Ek wil dans
kaalvoet in die reën.
wil die druppels tel
een vir een.
Die reuk van grond nat,
water wat teen die ruite spat.
Die weer se gedonder,
God se wonder.
Dan raak dit binne stil,
en laat die prag
die leemte vul.
Weg al die kommer
en seer
dan breek die strale deur.
Aangehuppel
oor die laaste druppel.
Dit lag binne my
skoongewas en vry!
- Van Graan

 

Hoe leef jy - elke dag?

Ons weet almal van “leef elke dag asof dit jou laaste is” en dit op sigself is moeilik genoeg. Hoe sê hulle, “life happens”. Ons is gejaagd, dinge moet gedoen word, en baie gou is ons hele lewe, en huis, bietjie deurmekaar.

Maar nou, ek het hierdie vriendin wat vir my sê sy leef elke dag asof kuiergaste kom! Dinge moet altyd mooi reg gepak wees, skoon en afgestof wees, daar moet altyd blomme op die tafel wees, vars gebakte koekies in die blikke en vars brood om te bedien. Hoeveel ure het sy in die dag wat ek nie het nie?!

Dit neem al my tyd en energie in beslag om te sien dat daar nie TE veel stof is nie, dat die kaste darem so elke nou en dan bietjie reg gepak word, dat die tafels en kaste nie oorgeneem word deur dinge wat mens sommer net neersit nie, dat daar darem kos in die yskas is en dat die stoorkamer darem netjies is. EN ek het huishulp en geen kinders in die huis nie!

Want daar is ander dinge in die lewe wat gebeur - soos skilder, tuinwerk, boeke om te lees, diere om na om te sien, blogs wat geskryf en gelees moet word, en kantoorwerk wat gedoen moet word. Hoe op aarde bly mens by met alles?

En tog doen ons dit. Want ons weet dat, 99% van die tyd gaan vandag NIE ons laaste dag wees nie en 99% van die tyd gaan daar NIE kuiergaste opdaag nie. En as die laaste dag van my lewe of ’n onverwagse kuiergas my vang met ’n deurmekaar huis of liasseerwerk wat nog nie gedoen is nie of stof op die tafel, so be it. Ek weet ek het elke dag ten volle geniet en benut en dit wat oorbly, moet maar wag tot ’n volgende keer.

Groot opwinding elke jaar!

Elke jaar is dit dieselfde vir my - groot opwinding in September, want dan kom my Grootstreepswaeltjies terug vanaf mid-Afrika - dan WEET 'n mens somer is hier! Maar hierdie jaar het hulle eers middel-Oktober opgedaag, en ek was baie bekommerd dat hulle nie hierdie jaar gaan terug kom nie.

Wanneer hulle almal begin saamtrek in die hemel en in lang rye op die telefoondrade sit in April of vroeg-Mei, dan weet ek ook ons winter is op pad...

 W&N waterverf op Bockingford 300gsm - ©Maree Clarkson

In die somermaande word Suid-Afrika se voëlbevolking met sowat 120 spesies versterk wat tot van Eurasië en die Midde-Ooste kom. Daar is selfs migrasies uit Midde-Afrika en Madagaskar. So is dit dan ook in Oktober dat ek wag vir die Piet-My-Vrou se geroep, een van die trekvoëls wat ook nie Afrika verlaat nie. Sy geroep, wat soms 3uur in die oggend begin en partymaal dwarsdeur die nag kan strek, is ook vir my 'n sekere teken dat die somer hier is.

Die voëls wat tydens ons winter wegtrek wissel van arende, valke, koekoeke en swaels tot van die reiers, ooievaars, eende, kwartels, riethane, sprinkaanvoëls, naguile, visvangers, byevreters, troupante, sangers, laksmanne en verskeie van die waadvoëls wat 'n mens by die vlak water aan ons strande of aan die oewers van ons damme of riviere kry. En elke jaar staan ek verstom en vol weemoed wanneer ek die samekomste waarneem en die groot wegtrek aanskou, wie weet hoeveel van hulle gaan dit maak en weer terug kom...?

::

die hemelblou is vir jou
pasop vir dit wat jy nie weet
laksman valk, aasvoel en arend
daar is baie wat jy nog nie van vere af weet nie
vlieg swaeltjie, vlieg!
- onbekend

.