Hier waar ek nou is

 

... en alles draai 

presies uit 

soos wat ek dit

nie voorgestel het nie.

Die mooiste dag omvou as jy tot die besef kom, vandag het ek 'n kans om reg te maak, lief te hê en dankie te sê.

::

Aanvaarding en kakiebos

 

Partymaal gebeur daar dinge in mens se lewe wat jou heeltemal deurmekaar krap en jou laat besef dat vrede baie broos is en sommer net so omver gegooi kan word. Jy wil met alle mag terug beur na hoe dit was voordat jou dag omgekrap is en klou hardnekkig aan die gedagte dat dit wel sal gebeur. 

My pa het altyd gesê, as iets jou pla, slaap daaroor, en dis presies wat ek gedoen het. Vanoggend toe ek wakker word toe besef ek dat dit partymaal nodig is om die lewe om jou te aanvaar net soos dit is en die beste van 'n slegte saak te maak. 

So tussen hakies, het jy geweet dat, alhoewel kakiebos 'n onkruid is, dit tog baie voordele het? Sit gerus van hierdie plant onder die beddegoed in jou hondehokke en die beddegoed kan selfs met water waarin kakiebos geweek is, gewas word vir langer vlooi- en luisbeheer.

Mag jou dag vreedsaam en gelukkig wees. 

::